ডিজিটেল ডেস্কঃ ইজৰাইলী প্ৰতিৰক্ষা বাহিনীয়ে (আই ডি এফ) বৃহস্পতিবাৰে ঘোষণা কৰে যে তেওঁলোকে মধ্য আৰু দক্ষিণ গাজাত সঠিকভাৱে স্থান নির্ধাৰণ কৰি স্থল আক্ৰমণ আৰম্ভ কৰিছে।
যোৱা জানুৱাৰীত যুদ্ধবিৰতি হোৱাৰ পাছত প্ৰথমবাৰৰ বাবে ইজৰাইলে বুধবাৰে স্থলভাগৰ পৰা আক্ৰমণ আৰম্ভ কৰে তথা উত্তৰ গাজাক দক্ষিণ গাজাৰ পৰা পৃথক কৰা কৰিডৰ নেতঝাৰিম কৰিডৰ নিজৰ দখললৈ আনে। ইজৰাইলী সেনাই কয় যে এতিয়াৰ পৰা দক্ষিণ গাজাৰ পৰা উত্তৰ গাজাত প্ৰৱেশ কৰিবলৈ দিয়া নহ'ব।
ইজৰাইলে বিমান আক্রমণেৰে গাজাত চাৰি শতাধিক পেলেষ্টাইনীক হত্যা কৰাৰ পাছতে দেশখনে স্থল আক্ৰমণ আৰম্ভ কৰে। আনহাতে গাজালৈ খাদ্য, ইন্ধন আৰু মানৱীয় যোগান বন্ধ কৰি দিয়া ইজৰাইলে কয় যে হামাছৰ হাতত থকা ৫৯জন পণবন্দীক মুক্তি নিদিয়া তথা অঞ্চলটোত হামাছে নিয়ন্ত্রণ এৰি নিদিয়া পর্যন্ত অভিযান প্ৰবল কৰা হ'ব।
ইফালে বুধবাৰৰ নিশাৰ পৰা বৃহস্পতিবাৰ পুৱালৈকে ইজৰাইলী আক্ৰমণত গাজাত ৮৫জন পেলেষ্টাইনীৰ মৃত্যু হয়। স্থানীয় স্বাস্থ্য বিষয়াসকলে এই কথা জনায়। এই সপ্তাহত ইজৰাইলে কৰা এইটো হৈছে দ্বিতীয় বৃহৎ আক্রমণ। এই আক্রমণ চলে খান ইউনিছ মহানগৰৰ বাহিৰৰ আবাচান আল-কবীৰা গাঁও, উত্তৰ গাজাৰ বেইত লাহিয়া নগৰ আদিত।
উৎস- দৈনিক জনমভূমি
