ডিজিটেল ডেস্কঃ উত্তৰাখণ্ডত 'দেৱী গংগা'ক প্রধানমন্ত্রী নৰেন্দ্ৰ মোদীয়ে পূজা-অর্চনা আগবঢ়োৱাৰ কেইঘণ্টামানৰ পাছতেই বৃহস্পতিবাৰে মোদীক আক্ৰমণৰ লক্ষ্য কৰি লয় কংগ্ৰেছৰ সভাপতি মল্লিকার্জুন খর্গেই।
কংগ্ৰেছৰ মুৰব্বীজনে কয় যে নৰেন্দ্ৰ মোদী নেতৃত্বৰ কেন্দ্ৰীয় চৰকাৰখনে গংগা নদীখনক পৰিষ্কাৰ কৰাৰ পৰিৱৰ্তে 'মা গংগা'ক কেৱল 'প্ৰৱঞ্চনা'হে কৰি আহিছে। উল্লেখযোগ্য যে বৃহস্পতিবাৰে পুৱা উত্তৰাখণ্ডৰ উত্তৰ কাশী জিলাত থকা মোক্ষ মন্দিৰত মোদীয়ে পূজা-অর্চনা আগবঢ়ায়। দেৱী গংগাৰ নামত উৎসর্গিত গংগোেত্ৰী মন্দিৰৰ দিশত এই মোক্ষ মন্দিৰটো অৱস্থিত। প্রতিবছৰে গংগোত্ৰী ধামৰ পৰা মোক্ষ মন্দিৰলৈ শীতকালৰ বাবে দেৱী গংগাৰ মূৰ্তি স্থানান্তৰ কৰা হয়।
কংগ্ৰেছৰ সভাপতি খর্গেই মোদীক কটাক্ষ কৰি 'এক্স'ত কয়, ''মোদীয়ে সদায় তেওঁক মা গংগাই মাতিছে বুলি কয়, কিন্তু সত্য কথাটো হৈছে যে গংগা পৰিষ্কাৰকৰণৰ দিশত মোদীয়ে দিয়া গেৰাণ্টী তেওঁ পাহৰিলে।' গংগা পৰিষ্কাৰকৰণৰ আঁচনিক পাহৰিলে মোদীয়ে৷''
উল্লেখযোগ্য যে ২০২৬ চনৰ ভিতৰত ব্যৱহৃত হ'বলগীয়াকৈ প্রায় ১১ বছৰ পূৰ্বে ৪২,৫০০ কোটি টকা ব্যয়সাপেক্ষ নমামী গংগা আঁচনি মুকলি কৰা হৈছিল, কিন্তু বিগত বৰ্ষৰ ডিচেম্বৰ মাহলৈকে এই আঁচনিৰ বাবে ধাৰ্য কৰা ১৯,২৭১ কোটি টকাহে খৰচ কৰা হৈছে বুলি খর্গেই কয়। মোদী চৰকাৰে 'মা গংগা'ৰ প্রতি অনীহা প্রকাশ কৰিছে বুলি খর্গেই অভিযোগ কৰে।
উৎসঃ দৈনিক জনমভূমি
