ডিজিটেল ডেস্কঃ পঞ্জাৱৰ মুখ্যমন্ত্ৰী ভগৱন্ত মানৰ কনভয় সন্দৰ্ভত এটা আচৰিত তথ্য প্ৰকাশ পাইছে। আৰটিআইত প্ৰকাশ পাইছে যে তেওঁ এতিয়ালৈকে পঞ্জাৱৰ মুখ্যমন্ত্ৰীসকলৰ ভিতৰত সৰ্বাধিক কনভয় লৈ ঘূৰে। ২০ বা ৩০ খন নহয় ৪২ খন বাহন তেওঁৰ কনভয়ত অন্তৰ্ভুক্ত হৈ আছে। আৰ টি আইত এই তথ্য ওলোৱাৰ পাছতেই এতিয়া তেওঁ বিৰোধীৰ আক্ৰমণৰ লক্ষ্য হৈ পৰিছে। নিজকে সাধাৰণ মানুহ বুলি অভিহিত কৰা মুখ্যমন্ত্ৰী ভগৱন্ত মানক তীব্ৰ সমালোচনা কৰিছে বিৰোধীয়ে। বিৰোধীয়ে কটাক্ষ কৰি কৈছে-এয়াই নেকি 'আম আদমী'ৰ স্বৰূপ।
কংগ্ৰেছ বিধায়িনী দলৰ নেতা প্ৰতাপ সিং বাজৱাই টুইট কৰি কয় যে ''২০০৭ চনৰ পৰা ২০১৭ চনলৈ মুখ্যমন্ত্ৰী হৈ থকা পৰকাশ সিং বাদলৰ কনভয়ত ৩৩খন বাহন আছিল। তেওঁৰ পাছত কেপ্তেইন অমৰিন্দৰ সিং পঞ্জাৱৰ মুখ্যমন্ত্ৰী হয় যদিও বাহনৰ সংখ্যাৰ কোনো পৰিৱৰ্তন নহ’ল। নিজকে সাধাৰণ মানুহ বুলি কোৱা ভগৱন্ত মানৰ কনভয়ত ৪২ খন বাহন থকাটো আচৰিত কথা।''
তথ্য অনুসৰি পঞ্জাৱ চৰকাৰত ২০০৭-২০১২ চনলৈ মুখ্যমন্ত্ৰীৰ কনভয়ত ৩৩খন বাহন, ২০১২-২০১৭ চনলৈ ৩৩খন বাহন, ২০১৭-২০২১ চনলৈ ৩৩খন বাহন, ২০২১-২০২২ চনলৈ ৩৯খন বাহন, ২০২২ চনত ৩৯খন বাহন আৰু এতিয়া ৪২খন বাহন অন্তৰ্ভুক্ত হৈছে বৰ্তমান চৰকাৰত অন্তৰ্ভুক্ত কৰা হৈছে।
আৰটিআইৰ অধীনত তথ্য অনুসৰি ২০২২ চনৰ ১ জুনৰ পৰা ৰাজ্যিক পৰিবহণ আয়ুক্তৰ কাৰ্যালয়ে পঞ্জাৱৰ মুখ্যমন্ত্ৰীৰ কনভয়লৈ ৪২খন বাহন প্ৰদান কৰিছে। তথ্যত প্ৰকাশ পাইছে যে ২০০৭ চনৰ ৩১ মাৰ্চৰ পৰা ২০১২ চনৰ ৩০ মাৰ্চলৈকে প্ৰাক্তন মুখ্যমন্ত্ৰী পৰকাশ সিং বাদলৰ প্ৰথম কাৰ্যকালত এছটিচিয়ে মুখ্যমন্ত্ৰীক প্ৰদান কৰা গাড়ীৰ সংখ্যা আছিল ৩৩খন। ২০১২ চনৰ ৩১ মাৰ্চৰ পৰা ২০১৭ চনৰ ৩০ মাৰ্চলৈকে দ্বিতীয়টো কাৰ্যকালত মুখ্যমন্ত্ৰী পৰকাশ সিং বাদলৰ কনভয়ত একে সংখ্যক গাড়ী আছিল।
কংগ্ৰেছৰ বিধায়ক সুখপাল সিং খাইৰাই টুইট কৰিছে- ''আমাৰ বন্ধু ভগৱন্ত মানে ৰাজনীতিবিদক ঠাট্টা কৰিছিল যে যিসকলে অতিৰিক্ত নিৰাপত্তা বিচাৰে আৰু মানুহক ভয় কৰে, তেওঁলোকে কুকুৰাৰ ফাৰ্ম খুলিলে ভাল হ’ব। এতিয়া আমাৰ একেজন সাধাৰণ মানুহকে ৪২খন গাড়ী লাগে। এয়া এক বৃহৎ পৰিৱৰ্তন।''
Continue Reading
