‘ভাইমন দা-এ ট্ৰিবিউট টু আছামিজ চিনেমা’ ; পোষ্টাৰ আৰু প্ৰথমটি গীতৰ অডিঅ’-ভিডিঅ’ৰ মুকলি

সোমবাৰে গুৱাহাটীৰ কাহিলীপাৰাৰ জ্যোতি চিত্ৰবনৰ ৰুদ্ৰ বৰুৱা প্ৰেক্ষাগৃহত ‘জিল ক্ৰিয়েশ্যনছ’ ৰ বেনাৰত ৯০ বছৰীয়া ঐতিহ্যমণ্ডিত অসমীয়া চিনেমাক গৌৰৱৰে উদযাপন কৰাৰ হেঁপাহেৰে মুনিন বৰুৱাৰ বৰ্ণিল জীৱন যাত্ৰাক আধাৰ হিচাপে লৈ নিৰ্মিত অসমীয়া ছবি ‘ভাইমন দা-এ ট্ৰিবিউট টু আছামিজ চিনেমা’ ৰ পোষ্টাৰ আৰু প্ৰথমটো গীতৰ অ’ডিঅ’-ভিডিঅ’ মুকলি কৰা হয় ৷ লগতে উক্ত অনুষ্ঠানত ৰূপকোঁৱৰ জ্যোতিপ্ৰসাদ আগৰৱালাই ১৯৩৫ চনৰে পৰা আৰম্ভ কৰা আৰু বৰ্তমানলৈকে চলি থকা অসমীয়া চিনেমাৰ গৌৰৱোজ্জ্বল ৯০বছৰীয়া ইতিহাস উদযাপনৰ উদ্দেশ্যৰে 'জ্যোতি জয়ন্তী' শীৰ্ষক নামকৰণ কৰা এটি বিশেষ ল’গ’ মুকলি কৰা হয় । ভাইমন দা ছবিখনৰ জৰিয়তে অসমীয়া চলচ্চিত্ৰ জগতখনে সেই সময়ছোৱাত সন্মুখীন হোৱা বিভিন্ন উত্থান-পতন, ঘাত-প্ৰতিঘাত তথা ছবিগৃহত হিন্দী চিনেমাৰ পয়োভৰৰ পিছত অসমীয়া চলচ্চিত্ৰই কেনেদৰে সপ্তাহজোৰা প্ৰদৰ্শনী লাভ কৰিছিল তাৰ আঁৰৰ সংঘৰ্ষৰ বিষয়ে চিত্ৰিত কৰা হৈছে ৷

ছবিখনৰ পৰিচালনা শশাংক সমীৰ আৰু সংগীত জুবিন গাৰ্গৰ। লগতে প্ৰযোজনা কৰিছে শ্যামন্তক গৌতমে। নতুন- পুৰণি প্ৰায় ৩৬০ গৰাকীৰো অধিক শিল্পী দেখিবলৈ পোৱা যাব এই ছবিখনত। ছবিখনৰ প্ৰথমটি গীত ‘বীয়েৰ ব্ৰেণ্ডি হুইস্কী’ শীৰ্ষক গীতটি সোমবাৰে মুক্তি লাভ কৰে। শীৰ্ষক গীতটিত কণ্ঠদান কৰিছে প্ৰবীণ বৰাই, মুনিন বৰুৱা আৰু শশাংক সমীৰৰ লিখনি আৰু সংগীত প্ৰযোজক পৰাণ বৰকাকটী। ইউটিউবত এই গীতটি উপলব্ধ।

ছবিখনৰ সন্দৰ্ভত গৰিমা শইকীয়া গাৰ্গে লিখে যে- শ্ৰদ্ধাৰ মুনিন বৰুৱা দেৱ( ভাইমন দা)ৰ জীৱনক আধাৰ হিচাবে লৈ নিৰ্মিত এই ছবিখনে বহন কৰিব অসমীয়া চিনেমাৰ কেইবাদশকৰ বৰ্ণিল যাত্ৰা । এই ছবিখনৰ জৰিয়তেই আমি উদযাপন কৰিব বিচাৰিছো ৯০ বছৰীয়া আমাৰ চিনেমাৰ দীৰ্ঘদিনীয়া সফল পৰিক্ৰমা ।’

এই ছবিখন ২০২৫ চনৰ ৭ ফেব্ৰুৱাৰীত মুক্তি লাভ কৰিব।